Blog

Komisioni i Pavarur i Kualifikimit njofton se pas shqyrtimit të dokumentacionit dhe zhvillimit të seancës dëgjimore, në datë 13.4.2021 për subjektin e rivlerësimit, z. Tasim Puçi bazuar në ligjin nr. 84/2016, sot, në datën 15.4.2021, vendosi:

Shkarkimin nga detyra të subjektit të rivlerësimit, z. Tasim Puçi prokuror pranë Gjykatës së Shkallës së Parë Berat.

Vendimi i arsyetuar me shkrim nga trupi gjykues i kryesuar nga z. Olsi Komici, znj. Suela Zhegu relatore, znj. Genta Tafa Bungo​ anëtare, do t’u njoftohet subjektit të rivlerësimit, komisionerëve publikë dhe vëzhguesve ndërkombëtarë brenda 30 ditëve.

Ky vendim mund të ankimohet në Kolegjin e Posaçëm të Apelimit nga subjekti i rivlerësimit dhe/ose Komisioneri Publik 15 ditë nga data e njoftimit të vendimit të Komisionit. Ankimi depozitohet në Komisionin e Pavarur të Kualifikimit.

Komisioni i Pavarur i Kualifikimit zhvilloi sot, në datën 15.4.2021, seancën publike për subjektin e rivlerësimit, z. Ramazan Avdiu. Gjatë zhvillimit të seancës dëgjimore, trupi gjykues u njoh me kërkesën e subjektit të rivlerësimit mbi një gabim material të konstatuar prej tij në analizën financiare të përgatitur nga Komisioni dhe kërkesën e tij për riçelje të hetimit, në vijim të së cilës u tërhoq në dhomë këshillimi për të diskutuar këtë kërkesë të z. Ramazan Avdiu.

Trupi gjykues, pasi u njoh me kërkesën e subjektit të rivlerësimit dhe pretendimet e tij, ka pranuar kërkesën e subjektit për rishikimin e analizës financiare, duke reflektuar gabimin material të kryer në hedhjen e kursimeve cash të deklaruara për vitin 2003, si dhe ka refuzuar kërkesën e tij për riçeljen e hetimit për dy kriteret e tjera të rivlerësimit, deri në këtë fazë të hetimit administrativ.

Komisioni i Pavarur i Kualifikimit do të njoftojë përsëri lidhur me vijimin e seancës dëgjimore për subjektin e rivlerësimit, z. Ramazan Avdiu.

Komisioni i Pavarur i Kualifikimit zhvilloi sot, në datën 14.4.2021, seancën publike për subjektin e rivlerësimit, znj. Dhurata Balla. Gjatë verifikimit të prezencës u konstatua se subjekti i rivlerësimit nuk ishte prezent, por ishte prezent përfaqësuesi i saj ligjor, i cili kërkoi shtyrjen e seancës për një datë tjetër për të pasur kohë për t’u njohur me materialet e dosjes së rivlerësimit.

Trupi gjykues, pasi u njoh me kërkesën e përfaqësuesit ligjor, megjithëse ka konstatuar shtyrje të përsëritura të procesit nga subjekti i rivlerësimit, vendosi të pranojë kërkesën për t’i dhënë kohë edhe përfaqësuesit ligjor të njihet me dosjen, duke shtyrë  seancën  dëgjimore  për subjektin e rivlerësimit, znj. Dhurata Balla, në datën 23.4.2021, ora 12:00, në të njëjtën sallë, në Pallatin e Koncerteve.